Ministri i Shëndetësisë, Arben Vitia, mori pjesë sot në simpoziumin e parë “Infermierët e bashkuar, një forcë për ndryshim”, i organizuar nga Oda e Infermierëve të Kosovës me rastin e Ditës Ndërkombëtare të Infermierisë.
Me këtë rast, ministri Vitia falënderoi të pranishmit dhe theksoi se kjo ngjarje bashkon infermierët, mamitë dhe profesionistët e tjerë të kujdesit shëndetësor për të shkëmbyer ide rreth zhvillimeve dhe përparimeve aktuale në fusha të cilat i përkasin sferës së infermierisë.
“Puna e infermierëve është boshti i një sistemi të fortë dhe të qëndrueshëm të kujdesit shëndetësor me qëllim që t’i përgjigjet në mënyrë efektive sfidave dhe me qëllim të ofrimit të shërbimeve sa më efikase për të gjithë qytetarët”, u shpreh Vitia.
Po ashtu, Vitia theksoi se roli i infermierëve është jetik në qëndrueshmërinë e sistemit shëndetësor.
“Për ne si Ministri e Shëndetësisë është obligim që në vazhdimësi të investojmë në edukimin infermieror, të trajtojmë me seriozitet mungesën në rritje të infermierisë, të ofrojmë mjedise praktike pozitive dhe shpërblim të përshtatshëm, të sigurojmë barazi gjinore dhe të përfshijmë infermierët në vendimmarrje në të gjitha nivelet e kujdesit shëndetësor”, tha Vitia.
Të pranishëm në këtë simpozium ishin edhe kryetarja e Odës së Infermierëve të Kosovës Nexhmije Gori dhe anëtar të tjerë të odës.
DTV
