Kryetari i Partisë Demokratike të Kosovës, Memli Krasniqi, shprehet i bindur se në vitin 2024 do të ketë zgjedhje të parakohshme në Kosovë.
Me këtë deklaratë të tij, nuk po pajtohet deputeti i Lëvizjes Vetëvendosje, Arbër Rexhaj.
Ai ka thënë që zgjedhjet nuk mund të bëhen kur dëshiron opozita.
“Lëvizja Vetëvendosje ka mandatin prej qytetarit për katër vite në udhëheqje dhe sigurisht atë duhet ta respektojë, mandati jonë përfundon me katër vite qeverisje dhe atëherë duhet të shkojë në zgjedhje. Zgjedhjet nuk mund të bëhen kur ka dëshirë opozita apo kushdo qoftë, ne jemi të gatshëm për zgjedhje qysh edhe nesër, mirëpo ne do të shkojmë atëherë kur na përfundon mandati”, u shpreh ai.
Sipas Krasniqit, viti që shkoi me këtë qeverisje, Kosova nuk ka përparuar në asnjë sektorë.
Mirëpo, Rexhaj thotë që progresi shihet qysh më 1 janar, që u hoqën edhe vizat.
“Regresi” po shihet më 1 janar, u hoqën vizat, tashmë qytetarët e veriut e paguajnë rrymën, dhe më 1 janar qytetarët e Kosovës lëvizin me targa RKS drejt Serbisë, gjë që nuk ka ndodh më parë. Ka përparim në veri të vendit në shumë fusha, sidomos asaj të sigurisë, ka përparim të konsiderueshëm në ekonomi, në mbrojtje dhe në veçanti në blerjen të armatimit dhe në përmirësimin e jetesës së qytetarëve”, tha ai.
Ndryshe, për media kanë folur edhe nga LDK-ja e AAK-ja të cilët kanë thënë se janë të gatshëm për të shkuar në zgjedhje të reja.
