Kryeministri i Kosovës, Albin Kurti në konferencën e përbashkët që pati me homologun e tij irlandez, Leo Vadakar ka folur edhe për draft-statutin e Asocacionit për të cilin kreu i ekzekutivit siç tha pati shprehur aftësinë për ta shkruar, shkruan Reporteri.net.
Por, Kurti theksoi hierarkia e gjërave nuk duhet të ngatërrohet, pasi ai tha se fillimisht duhet të jetë marrëveshja bazike, pastaj aneksi i zbatimit e më pas të flitet për Asociacionin e komunave me shumicë serbe.
“Me 26 tetor, dy ditë pasi i kam dhënë vërejtjet e mia kapitale për draft-statutin e Asociconit si propozim euro-amerikan, kam ofruar qe ta shkruaj një paketë ku është marrëveshja bazike, aneksi i zbatimit dhe ky draft statuti për të cilin i kam pasur vërejtjet, por aty në Bruksel mu tha që është çështje urgjente. Agresioni rus në Ukrainë nuk po përfundon, andaj është e domosdoshme që të bëjmë diçka shpejt. Mirëpo, oferta ime gjeneroze për nënshkrim u refuzua nga pala serbe. Në postimin tim në Facebook kam thënë që mund ta shkruaj një draft-statut meqenëse Lajçak tha se është çështje e brendshme e Kosovës. Atëherë pse kemi diskutuar ne për Asociacionin dy vjet në Bruksel, paskemi humbur kohë, nëse është çështje e brendshme qysh u tha, u tha për herë të parë se nuk është thënë deri në dhjetor, unë mund ta shkruaj. Pra kam shprehur aftësi vetjake për ta shkruar dhe ta diskutojmë, mirëpo mos ta ngatërrojmë hierarkinë e gjërave. Marrëveshja bazike, aneksi i zbatimit dhe më pas mund të flasim për Asociacionin”, tha kreu i Qeverisë.
Kryeministri i Kosovës theksoi se Asociacioni nuk duhet të nxirret nga paketa e marrëveshjes Kosovë-Serbi, pasi një gjë e tillë i bën dëm vendit.
Ai tha se Asociacioni nuk është top prioritet i normalizimit, andaj luti edhe kolegët e tij jo vetëm në Kosovë, që mos ta bëjnë një gjë të tillë.
“Të gjithë ata që e nxjerrin Asociacionin nga paketa, i bëjnë dëm Kosovës. Nuk mund ta nxjerresh Asociacionin e ta bësh prioritet për nga koha, ose në qendër për nga hapësira e tryezës. Asociacioni nuk është top prioriteti i normalizimit, është marrëveshja bazike. Andaj të gjithë kolegët e mi, jo vetëm në Kosovë, i lus që të mos e nxjerrin nga paketa Asociacionin si një çështje. Lexoni gjashtë fjalitë e para në marrëveshjen bazike dhe 11 nenet”, tha Kryeministri Kurti.
