Kryeministri i Kosovës, Albin Kurti, i ka kërkuar Bashkimit Europian që t’i heqë masat ndëshkuese, duke e akuzuar Brukselin për zbutje ndaj Serbisë në mes të tensioneve rajonale, shkruan mediumi i madh ndërkombëtar, Politico.
“Ne u kritikuam për dhunën në veri vitin e kaluar – padrejtësisht – dhe BE-ja vendosi masa kundër Kosovës. Nga ana tjetër, Serbia është duke u rreshtuar me Federatën Ruse në lidhje me agresionin në Ukrainë dhe nuk ka sanksione për Serbinë”, tha Kurti në një intervistë për Politico, në margjinat e Forumit Ekonomik Botëror në Davos të Zvicrës javën e kaluar.
BE-ja e goditi Kosovën me masa kufizuese verën e kaluar në përgjigje të një shpërthimi të dhunës të lidhur me votimin lokal në rajon. Masat në fakt ndaluan disa takime të nivelit të lartë ndërmjet zyrtarëve të BE-së dhe Kosovës, ndaluan projektet e BE-së dhe frenuan rrjedhat e financimit për Kosovën. Ato ndoqën një vit më shumë tensione të përshkallëzuara midis Serbisë dhe Kosovës, të cilat ishin përfshirë në një luftë të përgjakshme më shumë se dy dekada më parë.
Vendimi i BE-së për të vendosur kufizime – të cilat pasqyronin veprime të ngjashme nga Shtetet e Bashkuara – reflektoi zhgënjimin në rritje me qeverinë Kurti për trajtimin e zgjedhjeve të diskutueshme në veriun e vendit të dominuar nga serbët. Popullsia serbe bojkotoi zgjedhjet, të cilat rezultuan në zgjedhjen e katër kryetarëve shqiptarë me një pjesëmarrje të vogël. Me ndihmën e policisë, Kosova vendosi kryetarët e komunave, duke rezultuar në disa muaj me incidente të dhunshme.
Në një lloj përparimi, Kosova dhe Serbia njohën zyrtarisht targat e automjeteve të njëra-tjetrës në fillim të këtij muaji – një burim i madh tensioni gjatë vitit të kaluar. BE e përshëndeti këtë.
Por nuk ishte e mjaftueshme që Brukseli t’i rimendonte kufizimet e tij ndaj Kosovës.
“BE-ja ka bërë kërkesa specifike për deskalim në Kosovë dhe ato i janë komunikuar qartë dhe në mënyrë të përsëritur palës kosovare”, tha një zëdhënës i BE-së për politikë të jashtme. “Këto masa janë të kthyeshme – por Kosova ende nuk i ka përmbushur plotësisht ato kërkesa”.
Kërkesat e BE-së përfshinin themelimin e një asociacioni të komunave me shumicë serbe, një plan që daton që nga viti 2013, së bashku me mbajtjen e zgjedhjeve të reja në veri, shkruan Politico..
Kurti i tha Politico-s se qeveria e tij është e përkushtuar që së shpejti t’i mbajë zgjedhjet e reja. “Mund të jenë këtë vit – në muajt e ardhshëm”, tha ai, ndërsa shtoi se nënshkrimet nga të paktën 20 përqind e votuesve me të drejtë vote do të nevojiteshin për ta nisur procedurën – një proces që është duke u zhvilluar.
Muajin e kaluar, disa vende europiane i kërkuan shefit të diplomacisë së BE-së. Josep Borrell t’ë’i heqë kufizimet politike dhe ekonomike kundër Kosovës, duke vënë në dukje gjithashtu rolin që Serbia kishte luajtur në një sulm ndaj një fshati shtatorin e kaluar. Por BE-ja ende nuk ka lëvizur, me kontakte në minimum midis Brukselit dhe Prishtinës.
BE-ja është përmbajtur nga vendosja e masave kundër Serbisë, pavarësisht shqetësimeve të përhapura për zgjedhjet e muajit të kaluar në vend. Brukseli dënoi “përfshirjen vendimtare” të presidentit serb Aleksandar Vuçiq në votimin e 17 dhjetorit.
Kurti tha gjithashtu se Kosova dëshiron të anëtarësohet në NATO – edhe pse katër anëtarë të aleancës ende nuk e kanë njohur shtetin. “Ne duam t’i bashkohemi NATO-s dhe momenti i parë historik do të ishte Partneriteti për Paqe”, tha Kurti, duke iu referuar një programi që lejon bashkëpunimin mes NATO-s dhe vendeve joanëtare.
Qeveria e tij ka rritur shpenzimet e mbrojtjes – pjesërisht si përgjigje ndaj agresionit të shtuar serb, tha ai. Kosova kohët e fundit bleu dronë Bayraktar nga Turqia dhe do të marrë raketa antitank Javelin nga SHBA-ja. NATO dërgoi së fundmi 130 trupa shtesë për ta përforcuar misionin e saj në Kosovë.
