Një ngjarje e rëndë tragjike ka ndodhur ditën e premte në Ferizaj, ku një 21-vjeçare dyshohet se është vrarë nga ish-bashkëshorti i saj, V.A 36-vjeçar. Vrasja e rëndë ndodhi në hapësirat e Qendrës për Punë Sociale.
Viktima ishte e shoqëruar nga vëllai i saj, 15-vjeçar i cili u plagos po ashtu nga i dyshuari V. A.
Axha i viktimës, Idriz Cokli ka deklaruar se viktima ka qenë e ndarë më dorasin, përreth një viti.
Ai gjithashtu ka treguar se vëllai ka tentuar ta shpëtojë motrën.
“Vëllai ka tentu me shpëtu motrën e tij, atij i ka shkrepur në dorë, ndërsa vajzës në gjoks. Masanej ai thotë se nuk din asgjë… Policia e ka zënë kriminelin, dhe si shkon ai ashtu në gjykatë kokën lartë… brengosja ime është kjo, dyshoj se ka drejtësi..Që një vit janë ndarë, kanë pasur mosmarrëveshje, diferenca e viteve etj”, pohoi ai.
Tutje, ai ka thënë se djali i viktimës është duke qëndruar te Qendra për Punë Sociale, dhe se gjendja e tij shëndetësore është e mirë.
Ai po ashtu ka treguar se e ndjera ka pasur dhunë psiqike nga ish-bashkëshorti i saj.
“Ky kriminel duhet të dënohet në mënyrë maksimale, të jetë dënim meritor”, theksoi ai.
Vrasja e gruas në Ferizaj u dënua ashpër, ndërsa ndaj të dyshuarit tashmë i është caktuar masa e paraburgimit prej 1 muajsh.
