Ministri i Punëve të Brendshëm Xhelal Sveçla, raportimet e disa mediave kryesisht atyre serbe i ka quajtur “Lajme të porositura”, që kanë vetëm një qëllim sipas Sveçlës, duke dezinformuar tentojnë që t’i arsyetojnë veprimet kriminale.
“Fushata dezinformuese e Beogradit për të arsyetuar veprimet kriminale nuk ka të ndalur”, ka shkruar Sveçla në Facebook.
“Nuk ka lista të tilla. Ne nuk përpilojmë aso listash. Në Republikën tonë demokratike, prokuroria që ndjek krimin është degë tjetër e pushtetit prej policisë që zbaton ligjin e urdhrat dhe prej Ministrisë së Punëve të Brendshme që është degë e ekzekutivit”, ka shtuar ai.
Më tej, ka thënë se kjo po tentohet të përdoret nga Serbia e cila ka pretendime të hapura territoriale ndaj Kosovës, për të arsyetuar veprimet kriminale dhe për të frikësuar qytetarët serb të katër komunave në veri të Kosovës.
Ai ka përfunduar se Policia e Kosovës ka për detyrë që të jetë vigjilente në ruajtjen e sigurisë publike dhe luftimin e krimit në çdo kohë gjithmonë në urdhrat e organeve të drejtësisë.
