Kryetari i Partisë Demokratike të Kosovës, Memli Krasniqi, ka vizituar sot një ndërmarrje në Kamenicë, ku ka shprehur shqetësimin për emigrimin e fuqisë punëtore nga Kosova.
“Gjatë vizitës në Kamenicë, sot kam vizituar Fabrikën e mobiljeve “Wood Product” ku pronari Adil Kryeziu shprehu shqetësimin se punëtorët që kanë përvojë pune po ikin për punë në Kroaci dhe vende tjera të Bashkimit Evropian”, ka shkruar kreu i PDK-së në Facebook.
Krasniqi tha se shumë të rinj nga i gjithë vendi po e braktisin Kosovën në kërkim të persepektivës dhe rritjes së mirëqenies në shtetet tjera.
“Me këtë trend të ikjes, Kosova po rrezikon të mbetet një vend i braktisur, dhe shumë biznese rrezikojnë të shuhen në të ardhmen për shkak të mungesës së burimeve njerëzore”, tha ai.
“Prandaj, detyrë e jona e përbashkët duhet të jetë kthimi i besimit në institucione, duke krijuar kushte të favorshme për zhvillimin e bizneseve, përmes të cilave krijohen vende të reja pune me paga dinjitoze për qytetarët”, ka shkruar Krasniqi.
