Ministria e Drejtësisë ka thënë se është në fazën e përmbylljes së procedurave ligjore për transportimin e trupit të argjentinases, që dyshohet se u vra nga i dashuri i saj në Fushë Kosovë. Shpenzimet do të mbulohen nga Qeveria e Kosovës, por shuma s’është bërë e ditur. Para disa javësh, familja e 27-vjeçares ka kërkuar ndihmë për mbledhjen e 30 mijë eurove për të mundësuar kthimin e eshtrave së vajzës së tyre.
Trupi 27-vjeçares, Maria Clara Urdangaray, që dyshohet se u vra në Fushë Kosovë në fillim të muajit gusht, nuk është transportuar ende për në Argjentinë, te familja e saj.
Nga Ministria e Drejtësisë i kanë thënë Gazetës Express se janë në fazën e përmbylljes së procedurave ligjore dhe se Qeveria do t’i bartë shpenzimet për bartjen e kufomës, pa treguar shumën.
“Lidhur me pyetjet tuaja, ju informojmë se trupi i ndjerë i argjentinases ende nuk është transportuar në Argjentinë. Jemi në fazën e përmbylljes së procedurave ligjore dhe Qeveria e Kosovës do të bart shpenzimet për bartjen e kufomës”, thuhet në përgjigjet e MD’së.
27-vjeçarja vdiq në fillim të muajit gusht në Fushë Kosovë pasi ra nga kati i gjashtë i një ndërtese.
Dyshimet janë se në orët e para të 1 gushtit në Fushë Kosovë, Endrit Nikaj e ka gjuajtur nga kati i gjashtë argjentinasen. Ajo u dërgua në QKUK, mirëpo nuk arriti t’iu bëjë ballë lëndimeve që kishte pësuar.
“VRASJE: Fushë Kosovë 01.08.2023 – 01:59. Nga QKUK-ja është raportuar se ka ndërruar jeta viktima femër shtetase e Argjentinës si pasojë e lëndimeve të marra, që dyshohet se ka rënë nga një lartësi e objektit ku ka qenë duke qëndruar së bashku me te dyshuarin mashkull shtetas Zvicran. Me vendim të prokurorit kujdestar, trupi i pa jetë i viktimës është dërguar në IML për obduksion, ndërsa i dyshuari është arrestuar dhe dërguar në mbajtje. Rasti ne procedure hetimore”, thuhej në raportin 24 orësh të Policisë.
Para disa javësh, prindërit e saj kanë kërkuar ndihmë për mbledhjen e mjeteve financiare për ta bërë të mundur transportimin e trupit të vajzës së tyre nga Kosova në Argjentinë.
Facundo Urdangaray dhe Magdalena Delmonte, prindërit e viktimës, publikuan thirrjen në Facebook dhe kërkuan ndihmë për të sjellë eshtrat e vajzës së tyre në vendlindje. Në total familja Urdangaray duhet të mbledh mbi 30 mijë euro.
“Na ndihmo ta përhapim fjalën dhe kështu të sjellim mbetjet mortore të vajzës sonë të dashur. Llogaria është e aktivizuar, si për donacione në valutë kombëtare ashtu edhe për valutë”, sqaruan ata dhe falënderuan për “dashamirësinë dhe solidaritetin”.
Gjithashtu, ata theksuan angazhimin e drejtuesve të degës Banco Nación Buenos Aires dhe La Plata, për hapjen e “llogarisë së dhurimit”. Ata që dëshirojnë të bashkëpunojnë mund ta bëjnë këtë në llogarinë 7170363328, CBU: 0110717530071703633283.
Për këtë rast kanë raportuar mediat në Argjentinë e Zvicër, ndërkaq babai i të ndjerës është i bindur se vrasja e bijës së tij është femicid.
“Vajza ime kishte folur me mamanë e saj dhe e kishte përshkruar të dashurin si një femëror dhe shumë xheloz. Është një femicid, jam i bindur,” ka deklaruar Facundo Urdangaray, babai i Maria Clara.
Endrit Nika është arrestuar dhe tani ndodhet në paraburgim.
Gazeta zvicerane “Blick” ka raportuar se 32 vjeçari e kishte futur ilegalisht të dashurën e tij në Kosovë, duke e fshehur në bagazh të veturës.
