Serbia sot ka marrë një flakaresh të fuqishëm në rrafshin ndërkombëtar.
Serbia sot kapitulloi në tërësi në Kretë të Greqisë, duke mos arritur që të bllokojë votimin e Asamblesë së përgjithshme të Komitetit Ndërkombëtar të Lojërave Mesdhetare (ICMG), ku Kosovës i besohet organizimi i Lojërave Mesdhetar “Prishtina 2030”.
Media serbe “Veçernj Novosti” e ka pranuar humbjen dhe shkruan me mllef.
”Një skandal i madh ka ndodhur në sportin europian.
Komiteti Olimpik i Serbisë është i tmerruar nga Albin Kurti dhe vendimi i fundit.
Sot, 8 shtator 2023, në Asamblenë e Komitetit Ndërkombëtar të Lojërave Mesdhetare (ICMI), e cila u mbajt në Heraklion të Greqisë, pavarësisht kundërshtimeve të forta të Serbisë, por edhe kundër të gjitha rregullave dhe postulateve të organizatave ndërkombëtare sportive, që promovojnë mosndërhyrjen e politikës dhe sportit, Prishtina është votuar si nikoqire e Lojërave Mesdhetare 2030.
Në Kuvendin e sotëm pa lajmërim paraprak për delegatët është paraqitur dhe ka folur Albin Kurti. Komiteti Olimpik i Serbisë ka reaguar më ashpër ndaj kryeministrit të Kosovës dhe insistoi që vendimi për pritjen e Lojërave Mesdhetare 2030 të merret pas Lojërave Olimpike të vitit 2024, gjë që është praktikë në këto raste. Kryesia e ICMI-së refuzoi ta votojë këtë propozim të Serbisë dhe kështu delegatët i vuri para një fakti të kryer.
Pavarësisht se kandidatët e tjerë u tërhoqën dhe përkundër presionit të madh për të marrë vendimin unanimisht, organizimi i Lojërave Mesdhetare u dha, por me kundërshtim të fortë nga përfaqësuesit e Komitetit Olimpik të Serbisë, me tetë vota kundër”, shkarravit ky medium serb, satelit i Qeverisë së Serbisë.
Mediumi serb në asnjë formë nuk e thekson rezultatin e votimeve, 55 pro Kosovës, tre abstenime dhe 8 kundër, sepse nuk mund ta përtypin këtë kapitullim në Kretë në përballje me Kosovën.
