Sekretari i Përgjithshëm i NATO-s, Jens Stoltenberg ka folur sot gjatë një konference për media lidhur me situatën e sigurisë në Kosovë dhe Bosnjë e Hercegovinë.
Stoltenberg ka thënë se nuk sheh rreziqe të drejtpërdrejta ushtarake ndaj ndonjë vendi që është aleat i NATO’s.
Edhe pse tha se nuk ka ndonjë kërcënim direkt ushtarak, ai potencoi se ka rritje të tensioneve në Kosovë dhe Bosnjë.
“Nuk shohim rreziqe të drejtpërdrejta ushtarake ndaj ndonjë vend aleat të NATO-s në këtë regjion. Çka shohim është rritje e tensioneve veçanërisht në Kosovë dhe po ashtu në Bosnjë, por nuk shohim ndonjë kërcënim direkt ushtarak”, tha ai.
Stoltenberg më tej tha se në Kosovë tashmë kanë rritur prezencën e ushtarëve, janë vigjilent dhe e monitorojnë për së afërmi situatën.
