Ministria e Shëndetësisë ka shpallur gjendje epidemiologjike, pasi siç bënë të ditur, duke u bazuar në të dhënat e fundit nga IKSHPK dhe nga institucionet shëndetësore, intensiteti i gripit sezonal sipas numrit të rasteve të raportuara për javën e parë të vitit 2024, paraqitet me aktivitet më të lartë të qarkullimit dhe krahasuar me javën paraprake ka shënuar rritje dhe e kalon pragun epidemik.
Masat e rëndësishme për parandalim:
1. Mbuloni hundën dhe gojën kur të teshtini dhe kolliteni;
2. Praktikoni higjienën e duarve dhe shmangni kontaktet e afërta me të sëmurët;
3. Nëse jeni të sëmurë, qëndroni në shtëpi për të parandaluar përhapjen e mëtejshme;
4. Ushqimi i shëndetshëm me më shumë lëngje, kryesisht vitaminoz dhe gjumi i mjaftueshëm janë të rëndësishëm.
Kujdes i shtuar për grupet më të rrezikuara:
Është veçanërisht e rëndësishme që grupet si: Personeli shëndetësor, gratë shtatzëna, fëmijët, të moshuarit dhe personat me imunitet të dobësuar, të kenë kujdes më të shtuar gjatë sezonit të gripit.
Vaksinimi – mbetet mbrojtja më efikase:
Qysh në fillim të tetorit 2023 Ministria e Shëndetësisë ka siguruar 85,000 doza të vaksinës sezonale.
Vaksinimi është mbrojtja më e mirë kundër gripit.
Vaksinoheni një herë për të qenë të mbrojtur gjatë tërë sezonit kur gripi është më i shprehur.
“Ju lutemi të ndiqni këshillat e mësipërme për të mbrojtur veten dhe të tjerët!”, përfundon apelin MSH.
