Dy persona janë arrestuar sot në rastin e rënies së çatisë së Komunës së Prishtinës, më 18 janar ku u lëndua rëndë një vajzë dhe u shkaktuan dëme të konsiderueshme materiale.
DTV mëson se të arrestuarit janë Ylber Jashari, zyrtar i Komunës së Prishtinës dhe Behxhet Baftjaraj, person përgjegjës i kompanisë “NBT-ING”, e cila kishte fituar tenderin në vlerë prej 386 mijë eurove për rikonstruktimin e kulmit të objektit të Komunës së Prishtinës
“Prokuroria Themelore në Prishtinë, njofton opinionin publik lidhur me rastin e rënies së çatisë të objektit të Kadastrit të Komunës së Prishtinës, më 18.01.2024, ku si pasojë e kësaj ngjarjeje mbeti e lënduar rëndë një qytetare e Republikës së Kosovës dhe gjendja e saj shëndetësore mbetet ende kritike, si dhe në këtë ngjarje u shkaktuan dëme të konsiderueshme materiale, me ç’ rast në vazhdën e veprimeve hetimore, sot me vendim të Prokurorit të Shtetit janë ndaluar dy (2) persona të dyshuar në këtë rast, njëri nga ta është zyrtar i Komunës së Prishtinës me inicialet Y.J., përderisa personi tjetër i ndaluar me aktvendim të prokurorit është person përgjegjës i Kompanisë punuese për vend punishten e kompanisë në fjalë me inicialet B.B.
Po ashtu, ju njoftojmë se nga ana e Prokurorit të Shtetit është angazhuar eksperti gjyqësor nga lëmia e ndërtimtarisë në këtë çështje penale, në të cilën po vazhdojnë të zhvillohen hetime në koordinim me institucionet relevante”, thuhet në njoftimin e prokurorisë.
