Ekipi i politikanit liberal rus Boris Nadezhdin ka njoftuar se ka mbledhur me sukses 100 mijë firmat e nevojshme për të paraqitur kandidaturën e tij në zgjedhjet presidenciale të marsit në Rusi.
Skenat e paprecedentë të rusëve që rrinin me durim në qytetet e mëdha gjatë fundjavës për të nënshkruar kandidaturën e tij, rritën ndjeshëm popullaritetin e Nadezhdinit.
Në mesditën e së martës, kandidatura e Nadezhdin kishte marrë 101,607 nënshkrime mbështetjeje nga qytetarët rusë, megjithëse Nadezhdin i tha stafit të fushatës që të vazhdonte mbledhjen e nënshkrimeve derisa të arrinte në 150,000. Pasi të mblidhen, nënshkrimet duhet të dorëzohen në Komisionin Qendror të Zgjedhjeve (KQZ) për verifikim.
“Tashmë kemi mbledhur 101 mijë nënshkrime, por nuk janë perfekte. Ne duhet t’i dorëzojmë KQZ-së 105 mijë nënshkrime pa të meta që nuk mund të mos i njohin, prandaj duhet të mbledhim sa më shumë”, shkroi Nadezhdini në kanalin e tij Telegram të martën.
