Liburn Aliu, Ministër i Mjedisit, Planifikimit Hapësinor dhe Infrastrukturës, njofton se sot është mbajtur ceremonia zyrtare për hapjen e korridoreve të reja ajrore që lidhin Republikën e Kosovës dhe Republikën e Shqipërisë.
Në një postim në profilin e tij në Facebook, Aliu informon se shkurtimi i trajektoreve të fluturimeve për dhe nga Kosova përfshinë 08-12 minuta.
“Ulja e kostove të fluturimit jo vetëm që ndikon në uljen e shpenzimeve për linjat ajrore, por gjithashtu kontribuon në uljen e emetimit të gazrave serrë, duke shërbyer si një dëshmi e përkushtimit tonë ndaj mbrojtjes së mjedisit dhe përkrahjes së praktikave të qëndrueshme në fushën e aviacionit”, thekson ai tutje.
Sot mbajtëm ceremoninë zyrtare për hapjen e korridoreve të reja ajrore që lidhin Republikën e Kosovës dhe Republikën e Shqipërisë.
Bashkë me Kryeministrin Kurti, Ambasadorin e Gjermanisë në Kosovë, Jörn Rohde, drejtorin e Agjencionit të Shërbimit të Navigimit Ajror, Samir Bllacaku, si dhe përfaqësues diplomatikë, kolegë dhe bashkëpunëtorë, shënuam ngjarjen historike të hapjes së korridoreve të reja ajrore që lidhin Republikën e Kosovës dhe Republikën e Shqipërisë, si një prej të arriturave më të rëndësishme drejt përpjekjeve të vazhdueshme për normalizimin e hapësirës ajrore të Kosovës.
Shkurtimi i trajektoreve të fluturimeve për dhe nga Kosova për 08-12 minuta, e bën aeroportin e Prishtinës më konkurrues me aeroportet e tjera në rajon. Ulja e kostove të fluturimit jo vetëm që ndikon në uljen e shpenzimeve për linjat ajrore, por gjithashtu kontribuon në uljen e emetimit të gazrave serrë, duke shërbyer si një dëshmi e përkushtimit tonë ndaj mbrojtjes së mjedisit dhe përkrahjes së praktikave të qëndrueshme në fushën e aviacionit.
Ndërsa sot po e festojmë këtë arritje të rëndësishme, është e domosdoshme që të vazhdojmë më tej me punët e bashkërenduara me të gjithë akterët për normalizimin e hapësirës së lartë ajrore, përfshirë këtu kontrollin e plotë mbi hapësirën ajrore të lartë, ku bashkë me ASHNA, si një lojtar kyç në këtë proces, si në aspektin teknik ashtu edhe profesional, po angazhohemi maksimalisht në këtë drejtim.
