Dëshmitari Kurtesh Fondaj gjatë dëshmisë së tij në Hagë ka deklaruar se nuk e ka ditur se cilat kanë qenë detyrat e Rexhep Selimit gjatë periudhës së luftës.
Fondaj ka thënë se Selimi ka qenë gjatë kohës së luftës në Kosovë dhe e quajti si luftëtar trim.
”Faktin se ai ishte në Kosovë nuk do me thanë kjo, por domethënë që realisht ka qenë një prej luftëtarëve më trima që në rrethanat e muajit shtator me qëndru në Kosovë ka qenë problematike. Sidomos në muajin shtator po e përmendi”, ka thënë Fondaj.
Tutje, Fondaj mbeti i qëndrimit se nuk i kujtohet nëse është takuar ndonjëherë tjetër me Selimin dhe se shtatori 1998 është hera e fundit kur ishin takuar.
“Unë e kam respektu Rexhep Selimin dhe kam pas qef me u taku me atë edhe privatisht. Nëse do ta kisha ditë që ai ka qenë afër meje do ta kisha insistuar që të takohem me atë qoftë për ta përshëndetur”, ka thënë ndër tjerash Fondaj, transmeton Betimi për Drejtësi.
Gjithashtu, dëshmitari u pyet edhe për strukturën organizative të Brigadës 123, në të cilën ai kishte udhëheqësinë, teksa mohoi të ketë dëgjuar se ka pasur ndonjë objekt ndalimi ose të ndaluar në ato zona.
