Një autobus i kompanisë “Shpejtimi” është vetaksidentuar rëndë në mëngjesin e sotëm në magjistralen Gjakovë – Prizren.
Drejtori rajonal i Policisë në Gjakovë, Lumni Graishta, ka thënë se nuk është raportuar për të lënduar.
“Përveç dëmeve materiale nuk është raportuar për të lënduar”, ka thënë Graishta.
Ndërsa, pronari i autosallonit, Shkelzen Bushati ka publikuar pamjet kur autobusi futet në oborrin e kompanisë dhe shkakton dëme të mëdha materiale.
Ai përmes një njoftimi në Facebook ka deklaruar se dyshon se si pasojë e këtij aksidenti janë shkaktuar dëme në vlerë të rreth 200 mijë eurove.
“Sot, në ora 03:00 të mëngjesit, në hapësirat e autosallonit XENI, është vetë aksidentuar Autobusi i firmës “Shpejtimi”, i cili ishte duke qarkulluar në magjistralen Gjakovë-Prizren, duke shkaktuar dëme të konsiderueshme materiale për kompanin tonë. Vetëm nga aksidenti i sotëm, në automjetet e sallonit, janë shkaktuar dëme në vlerën rreth 200.000 euro, duke mos llogaritur këtu dëmet në infrastrukturën rrethuese”, ka shkruar Bushati.
