Zëvendëskryeministri për Integrim Evropian, Zhvillim dhe Dialog, Besnik Bislimi e konsideron shumë të rëndësishëm bashkëpunimin me Bankën Botërore, për realizmin e projekteve ekzistuese, përfshirë Programin e Tregtisë dhe Transportit, i cili parashikon përmirësimin e infrastrukturës dhe procedurave në pikëkalimet kufitare.
Këto komente Bislimi i ka bërë në një takimin me drejtoreshën Rajonale të Bankës Botërore për Ballkanin Perëndimor, Evropë dhe Azinë Qendrore, Xiaoqing Yu, e cila në takim shoqërohej nga drejtori i zyrës së Bankës Botërore për Kosovë dhe Maqedoninë e Veriut, Massimiliano Paolucci.
Në takim, u fol mbi mbarëvajtjen e proceseve të ndryshme, ku u përmend ndër të tjera edhe avancimi drejt integrimit në SEPA, njofton Qeveria e Kosovës.
Duke vlerësuar bashkëpunimin me Bankën Botërore, Bislmi e theksoi rëndësinë e mbështetjes për projekte ekzistuese e potenciale e ku kontributi, siç tha ai, mund të jetë i qenësishëm dhe i rëndësishëm.
Ai veçoi Programin e Tregtisë dhe Transportit, i cili “parashihet të përmirësojë infrastrukturën dhe procedurat në pikëkalimet kufitare, si dhe të rrisë kapacitetet dhe konkurrueshmërinë e produkteve vendore, me investime në laboratore testuese e më gjerë”.
Sipas njoftimit të Qeverisë në takim u diskutua edhe ndërlidhja e Kosovës me rajonin e më gjerë dhe ngritja e përmirësimi i infrastrukturës, si katalizator për më shumë zhvillim e lehtësim të transportit.
