Përmes një iniciative novatore të frymëzuar nga qëndresa e Dr. Steven Hawking, projekti HAWKING (Harvesting (digital) Alternation in Ways that Knock-down Inaccessibility of New Generations) i përkushtohet revolucionarizimit të peizazhit në arsimin e lartë për individët me aftësi të kufizuara në Ballkanin Perëndimor. Me lider Universitetin e Malit të Zi, ky projekt trevjeçar “Erasmus+KA2 CBHE strand 2”, 2023-2026, synon të adresojë pabarazitë e thella me të cilat përballen personat me aftësi të kufizuara, veçanërisht në drejtim të arsimimit dhe mundësive të punësimit në rajon.
Fokusi kryesor i projektit HAWKING është të promovojë transformimin digjital në arsimin e lartë përmes optikës së të drejtës sociale, duke theksuar barazinë, drejtësinë dhe aksesin për studentët me aftësi të kufizuara. Duke bashkëpunuar me institucione të arsimit të lartë dhe organizatat civile në një partneritet që përfshin pesëmbëdhjetë institucione, shtatë IAL përfituese të Ballkanit Perëndimor: Universiteti i Malit të Zi, koordinatori i projektit dhe Universiteti Adriatik nga Mali i Zi, Universiteti i Tuzlës, Universiteti i Bijeljinës dhe Universiteti i Sarajevës Lindore nga Bosnja dhe Hercegovina, Universiteti “Ismail Qemali”, Vlorë dhe Universiteti “Fan S. Noli”, Korçë nga Shqipëria, pesë IAL nga BE-ja dhe vende të treta të asociuara me programin: Universiteti i Mariborit, Slloveni, Universiteti i Konias, Turqi , Universiteti i Madeiras, Portugali, Kolegji i Trajnimit të Mësuesve dhe Informatikës së Biznesit – Sirmium, Sremska Mitrovica, Serbi, Instituti i Ballkanit Perëndimor/WEBIN, Serbi, Universiteti i Nikosias, Qipro, dhe dy OJQ nga vende të Ballkanit Perëndimor: Qendra Pedagogjike e Malit të Zi dhe Organizata e të Amputuarve/UDAS, Bosnjë dhe Hercegovinë, HAWKING kërkon të përmirësojë aftësitë digjitale dhe përfshirjen, duke kontribuar kështu në zhvillimin ekonomik dhe social të këtyre vendeve. Konsorciumi përfshin staf që vijnë nga fusha të ndryshme si: shkencat natyrore, matematika, teknologjitë digjitale, arsimi përfshirës dhe shkencat sociale për të adresuar çështjet e projektit në mënyrë gjithëpërfshirëse. Si i tillë, projekti fokusohet në krijimin e lidhjeve të forta ndërmjet universiteteve dhe komuniteteve përmes angazhimit me partnerë joakademikë si shkollat dhe bashkitë.
Një nga objektivat parësorë të projektit HAWKING është krijimi i mekanizmave gjithëpërfshirës të tranzicionit digjital nga arsimi i mesëm në atë të lartë, me një theks të veçantë te studentët me aftësi të kufizuara në institucionet partnere të arsimit të lartë (IAL). Për më tepër, projekti synon të përmirësojë mjedisin institucional dhe infrastrukturor në IAL-të partnere për të përmirësuar metodologjitë gjithëpërfshirëse të mësimdhënies dhe për të kapërcyer hendeqet në digjitalizim të arsimit dhe në ofrimin e mbështetjes.
Veçanërisht, projekti HAWKING përputhet me qëllimet më të gjera të promovimit të arsimit gjithëpërfshirës, barazisë dhe drejtësinë në arsimin e lartë, me një fokus të veçantë në adresimin e hendekut gjinor në aftësitë digjitale. Duke nxitur bashkëpunimin ndërmjet institucioneve dhe duke ndarë praktikat më të mira, HAWKING synon të kapërcejë sfida të tilla si aksesi i kufizuar për studentët me aftësi të kufizuara në IAL-të e Ballkanit Perëndimor dhe pabarazia në asistencën për studime për shkak të mospërdorimit të mjeteve dhe shërbimeve digjitale.
Nëpërmjet gjashtë paketave të strukturuara, projekti HAWKING do të japë rezultate konkrete, duke përfshirë sesione trajnimi, seminare, vendosjen e shërbimeve mbështetëse gjithëpërfshirëse, optimizimin e mjeteve dhe materialeve digjitale arsimore dhe përmirësimin e metodologjive të mësimdhënies gjithëpërfshirëse. Duke i dhënë përparësi një qasjeje të përqendruar te njeriu dhe duke theksuar aspektet etike në kërkimin akademik, HAWKING synon ta bëjë teknologjinë mundësues të arsimit gjithëpërfshirës, duke krijuar një të ardhme më demokratike dhe gjithëpërfshirëse për arsimin e lartë në rajon.
